مکھ پنا پنچم سچیت مہینہ وار ماں بولی مضمون ویڈیو جان پچھان رابطے لئی  
پراگے
جنوری، فروری
مارچ، اپریل
مئی، جون
جولائی
اگست، ستمبر
اکتوبر، نومبر
دسمبر
مہینہ وار ماں بولی
مہینہ وار ماں بولی دا مُڈھ کتاب لڑی بنیا۔ پہلی کتاب 1986 وِچ چھپی۔ بولی کیہ ہوندی اے ایہدا اپنے بولن والیاں نال کیہ رِشتہ ہوندا اے، ایہہ کیویں بندے نُوں آپنا آل دوالا، آپنا آپ تے آپنے لوک سمجھن وِچ مدد دیندی اے۔ سمجھ سُرت نُوں کیویں بناوندی تے اِک دُوجے نال سانجھا کردی اے۔ بندے دے قُدرت نُوں بندیاون وِچ بولی کینکر ہورناں رچھاں نال رل کے بندے دے کم آوندی اے۔ بندے کول اوہدی بولی ہووے تاں اوہ کیہ کُجھ کر سکدا اے، جے بولی اوہدے توں کھس لئی جاوے تاں اوہ کیہ ہو جاندا اے۔ اوہدا آپنے آپ آپنے لوکاں تے آپنے آل دوالے نال کیویں وجوگ جنمدا اے تے اوہ کیویں آپنے وسیبے نُوں آپنی کُھل نال اگے ودھاون دی تھاں دھاڑوِیاں تے قبضے گیراں دا باندھا تے ہتھ ٹھوکا ہو نِبڑدا اے۔  
کتاب لڑی ماں بولی چھوہندیاں ایہہ سارے پکھ ساڈے مُوہرے سن تے اسیں ایہناں بارے آپنے عام پڑھیاں لِکھیاں نال گل ٹورنی چاہوندے ساں۔ ارادہ سی ایہناں لڑی وار کتاباں وِچ بولی سانگے ای لِکھتاں ہوون تے ایہناں اُتے وکھ وکھ سیانیاں دے وچار ورتائے جاون۔ دو کتاباں ایسے ٹیچے سِر چھپیاں۔ تریجی وِچ سانوں آپنے متے نال رلوِیاں ہور لِکھتاں چھاپن دی وی سُجھی تاں جو لڑی وار کتاب دے لِکھن پڑھن والیاں دا پِڑ چوکھا وڈا ہو سکے۔  
ماں بولی لڑی دِیاں تھوڑے باہلے کھپیاں نال پنج کتاباں چھپیاں۔ مُل بُہت تھوڑا رکھیا گیا تے جتن کیتا گیا جو ایہہ کتاباں ہتھیں ورتائیاں جاون تے جانُو انجانُو لوکاں نُوں ایس کم وِچ سِیر پاون دی پریرنا دِتی جاوے۔ تھاؤں تھائیں جانُواں بُجھواں دی مدد نال بیٹھکاں کیتیاں گئیاں تے لوکاں نُوں ماں بولی دی لوڑ بابت ساؤدھان کرن دا چارہ لایا گیا۔  
ایہہ ضیائی مارشل لاء دا زمانہ سی۔ چنگا بھیڑا ہر ون دا ہنگُورا سانوں رلیا۔ ضیاء مویا تاں رسالیاں اخباراں نُوں سرکاری اجازت نامے لین دی سوکھ ہو گئی۔ ماں بولی نُوں وی اجازت نامہ لے کے کتاب لڑی توں مہینہ وار پراگا بناون دا ڈھوء لگ گیا۔ 1989 توں 1997 تیک ماں بولی پھیر مہینہ وار ای چھپیا۔ مہینہ وار ماں بولی نے اِک تاں لفظ ماں بولی لوکاں دے ذہناں وِچ پکا کیتا۔ بولی بابت سوچن دا اپرالا ٹوریا۔ دُوجا ایہنے کُل پنجاب دِیاں لِکھتاں پڑھاکاں نال سانجھیاں کیتیاں۔ ہر بُلیل سانجھا کیتا۔ شاعری کہانی تے پڑچول دے نال نال ایہنے کلا تے سوچ دے ہور مُدیاں اُتے وی لِکھتاں تے اُلتھے ورتائے۔ پراگے تُہاڈے نال سانجھے کردے پئے ہاں۔ ایہناں وِچ جو کُجھ وی جِنی ون سوَن نال چھپیا، تُہاڈے ساہمنے ہے۔ پڑھو تے ساڈے نال وچار سانجھے کرو۔ چیتے رہوے ایہو پرچہ اگے جا کے 1998 وِچ مہینہ وار پنچم ہویا۔  
مہینہ وار ماں بولی دے چھپواک مُنیرالدین خالد تے سودھی مقصود ثاقب سن۔
چون
دسمبر1997
            

WWW.PUNCHAM.COM - All Rights Reserved
Suchet Kitab Ghar, 11 Sharaf Mansion, 16 Queens Road,
Chauk Ganga Ram, Lahore, Pakistan
Phone: (+92) 42 36308265, Email: info@puncham.com